April 14, 2024

Bustan Daily

Trusted Source for Online News Publishing

A Katsina Yara sama da 2000 sun zama marayu a Batsari’

2 min read

Uban kasar Batsari da ke jihar Katsina yankin arewa maso yammacin Najeriya ya ce akwai daruruwan mata da aka bari da marayu sakamakon hare-haren ‘yan bindiga da suka kashe mazajensu.

Hakimin na Batsari, Sarkin Ruman Katsina, Alhaji Tukur Mu’azu Ruma ya shaida wa BBC cewa ba zai iya kiyasta adadin mutanen da aka kashe ba, amma a ya ce “mata kimanin 600 ne aka kashe mazajensu yayin da aka bar marayu sama da 2000.”

Sannan ya ce kusan kashi daya cikin uku na mutanen masarautarsa sun zama ‘yan gudun hijira inda suka warwatsu a jihohi makwabta da sauran sassan Najeriya.

“Sun yi muna ta’adi sosai duk kasar ta fashe kuma babu ranar da ba kai hare-hare, kusan kullum sai an kashe mutum daya zuwa biyu,” inji Hakimin na Batsari.

Ya kara da cewa, baya ga asarar rayuka da dukiyoyin da lamarin ke haifarwa, ya kuma gurgunta harkokin noma da kiwo da kasuwanci da sauran harkokin tattalin arziki.

A cewarsa ‘yan bindigar sun yi ta’adi duk kasar ta fashe sun hana noma da kiwo – “A bara kashi 40 cikin dari ba su yi noma ba saboda duk wanda ya fita za a yi garkuwa da shi.”

Basaraken ya ce yankinsa na cikin wani matsanancin hali na matukar bukatar agajin gwamnati da masu hannu da shuni, duk da ya ce gwamnati na ciyar da mutanen da ke gudun hijira a wani sansani.

Leave a Reply

Your email address will not be published. Required fields are marked *